Hvaða rannsóknir hefur Oddný Mjöll Arnardóttir stundað?

Nafn þitt

Netfang þitt

Netfang móttakanda

Ruslpóstvörn =

Svar

Hvaða rannsóknir hefur Oddný Mjöll Arnardóttir stundað?
Oddný Mjöll Arnardóttir er rannsóknaprófessor við Háskóla Íslands og dómari við Landsrétt. Í rannsóknum sínum hefur hún einkum fengist við mannréttindi, bæði frá sjónarhorni stjórnskipunarréttar, þjóðaréttar og Evrópuréttar. Þá hafa viðfangsefni hennar öðrum þræði verið réttarheimspekileg auk þess sem hún hefur lagt áherslu á aðferðir dómstóla við að komast að niðurstöðum og samspil ólíkra réttarkerfa.

Í rannsóknum sínum hefur Oddný meðal annars fjallað um jafnræðisreglur, réttindi sjúklinga og réttindi fatlaðs fólks. Síðustu ár hefur hún þó lagt áherslu á aðferðir Mannréttindadómsóls Evrópu við rökstuðning dóma, stöðu hans og samspil við landsrétt annars vegar og Evrópurétt hins vegar. Um þessi álitaefni er meðal annars fjallað í bókum hennar Shifting Centres of Gravity in Human Rights Protection: Rethinking Relations between the ECHR, EU and National legal Orders (ritstj. ásamt Antoine Buyse, Routledge, 2016) og Nálægðarregla, svigrúm til mats og samband Mannréttindadómstóls Evrópu við landsrétt (Codex, væntanleg 2018).

Oddný hefur verið virk í alþjóðlegu rannsóknasamstarfi og meðal annars verið gestaprófessor við Háskólann í Kaupmannahöfn og háskólastofnun Evrópusambandsins í Flórens (Europa University Institute). Meirihluti fræðiskrifa Oddnýjar hefur birst á alþjóðlegum vettvangi, meðal annars í viðurkenndum tímaritum svo sem European Journal of International Law, International Journal of Constitutional Law, European Constitutional Law Review og Human Rights Law Review. Þá hefur hún bæði tekið þátt í og stjórnað styrktum rannsóknarverkefnum.

Oddný hefur starfað í ýmsum stjórnsýslunefndum og var til dæmis meðlimur í sérfræðingahóp um viðbrögð stjórnsýslunnar við skýrslu Rannsóknarnefndar Alþingis um aðdraganda og orsakir falls íslensku bankanna 2008. Þá starfaði hún um tíma sem varaformaður Kærunefndar útlendingamála. Einnig hefur hún átt sæti í sérfræðingahóp á vegum mannréttindastjóra Sameinuðu þjóðanna.

Oddný er fædd árið 1970. Hún lauk embættisprófi í lögfræði árið 1994 og öðlaðist réttindi til málflutnings fyrir héraðsdómi árið 1995. Hún lauk doktorsgráðu frá lagadeild Edinborgarháskóla árið 2002 og var þar með fyrsta íslenska konan sem útskrifaðist með doktorsgráðu í lögfræði. Oddný hefur tekið sæti sem settur dómari í einstökum málum við Mannréttindadómstól Evrópu og Hæstarétt Íslands.

Mynd:

• © Kristinn Ingvarsson.

...