Hve margar dýrategundir eru til í Amasonregnskóginum?

Svar

Rauði-ari (Ara macao) er ein þeirra fjölmörgu fuglategunda sem eiga sér heimkynni í Amasonskógunum.

Regnskógar eru tegundaríkustu vistkerfi jarðar og Amasonregnskógarnir eru tegundaríkustu regnskógar jarðar. Rannsóknir hafa sýnt að þetta mikla skóglendi sem nær yfir stóran hluta Brasilíu, Kólumbíu, Venesúela, Perú og Ekvador er mun tegundaríkara en regnskógar Mið-Afríku og Suður-Asíu. Spyrjandi veltir fyrir sér hve margar dýrategundir sé að finna í skógunum. Eiginlega veit það enginn en höfundur þessa svars birtir hér tölur sem eru mat nokkurra vísindamanna á fjölda dýra eftir helstu flokkum dýraríkisins:

Flokkur:	Fjöldi tegunda:
Skordýr (Insecta)	2.500.000
Spendýr (Mammalia)	427
Fuglar (Aves)	1.294
Froskdýr (Amphibia)	428
Skriðdýr (Reptilia)	378
Fiskar*	2.200

*Fiskar eru ekki flokkur samkvæmt flokkunarfræði nútímans heldur samansafn nokkurra mismunandi flokka.

Athuga ber að fjöldi skordýrategunda byggir á mati vísindamanna en hjá hinum tegundunum er byggt á vísindalegri skráningu. Þarna er þó ótalinn fjöldi tegunda áttfætla og annarra hryggleysingja en sá fjöldi getur hlaupið á tugum þúsunda tegunda.

Letidýr (Bradypus variegatus) búa í trjám Amasonregnskóganna.

Amasonregnskógarnir eru einstakt vistkerfi. Ein af hverjum tíu fisktegundum heimsins lifa í ám Amasonsvæðisins, að fiskum heimshafanna meðtöldum. Enn fremur á ein af hverjum fimm fuglategundum heims sér heimkynni á þessu svæði.

Frumframleiðni skóganna er gífurleg en talið er að lífmassi á hverjum ferkílómetra í Amasonskógunum sé að jafnaði um 90.790 tonn af plöntum, þar með talið trjáplöntum. Þetta er langmesti lífmassi sem fyrirfinnst á jörðinni.

Myndir:

• Scarlet Macaw - Wikipedia, the free encyclopedia. Ljósmyndari er Matthew Romack og er myndin birt undir Creative Commons-leyfi. Sótt 6. júní 2012
• Sloth - Wikipedia, the free encyclopedia. Ljósmyndari er Christian Mehlführer og er myndin birt undir Creative Commons-leyfi. Sótt 6. júní 2012.