Hvað myndi gerast ef gjaldmiðill eins og peningar yrði að öllu leyti lagður niður?

Nafn þitt

Netfang þitt

Netfang móttakanda

Ruslpóstvörn =

Svar

Hvað myndi gerast ef gjaldmiðill eins og peningar yrði að öllu leyti lagður niður?
Einfaldasta svarið er væntanlega það að þess yrði vart langt að bíða að peningar yrðu teknir aftur upp! Engu að síður er gaman að velta þessum möguleika fyrir sér.

Peningar gegna afar mikilvægu hlutverki í nútímasamfélögum, meðal annars sem greiðslumiðill og mælikvarði á verðmæti. Ef þeir væru ekki til staðar er við því að búast að ákveðnar vörur tækju við hlutverki þeirra, til dæmis góðmálmar en áður fyrr gegndu þeir svipuðu hlutverki og peningar nú. Nánar er fjallað um sögu peninga í svari sama höfundar hér á Vísindavefnum við spurningunni Hver fann upp peningana? Peningar eru hins vegar mun hentugri að mörgu leyti en góðmálmar sem greiðslumiðill og því væri þetta skref aftur á bak. Óhagræðið væri talsvert og við því að búast að eitthvað drægi úr viðskiptum þótt erfitt sé að meta hve mikið.

Það er annað mál að ýmislegt bendir til þess að peningar í þeirri mynd sem við þekkjum nú, seðlar og mynt, muni skipta sífellt minna máli í framtíðinni og jafnvel hverfa af sjónarsviðinu. Ástæðan er að rafrænar greiðslur skipta sífellt meira máli og þær hafa marga kosti umfram vafstur með seðla og mynt. Ef þetta gengur eftir verða peningar ekki til nema annars vegar sem innstæður á ýmiss konar reikningum og hins vegar sem safngripir.

Frekara lesefni á Vísindavefnum:

• Hvað duga peningaseðlar og mynt lengi? eftir Stefán Arnarson
• Hvað er mikið til af íslenskum seðlum og myntum? eftir Gylfa Magnússon
• Eykst peningamagn í umferð með tilkomu greiðslukorta? eftir Gylfa Magnússon

...