Úr hvaða efni er litaduftið í Color Run eða litahlaupinu?

Nafn þitt

Netfang þitt

Netfang móttakanda

Ruslpóstvörn =

Svar

Úr hvaða efni er litaduftið í Color Run eða litahlaupinu?
Litahlaupið (e. The Color Run) nýtur vinsælda hér á landi eins og víða annars staðar í heiminum. Hlaupið er 5 km langt og því fylgir mikil gleði og litadýrð. Hlaupið var fyrst haldið í Phoenix í Bandaríkjunum árið 2012 og síðan þá hafa rúmlega 40 lönd bæst í hópinn. Hlaupið hefur farið fram árlega í júní í Reykjavík síðan 2015 en árið 2018 er einnig hlaupið á Akureyri. Um 10 þúsund manns tóku þátt í hlaupinu á Íslandi fyrsta árið en næstu tvö ár á eftir voru þáttakendur um 12 þúsund. Engin tímataka er í hlaupinu enda ekki um keppni að ræða heldur fyrst og fremst skemmtun.

Eftir hvern kílómetra er hlaupið í gegnum litastöð þar sem tónlist er spiluð og litapúðri ausið yfir þátttakendur, mismunandi litur er á hverri stöð. Aðaluppistaða litapúðursins er maíssterkja en í því er einnig lyftiduft og litarefni.

Maíssterkja (e. corn starch) er möluð fræhvíta úr maískorni og þekkist einnig undir heitinu maísenamjöl. Hún er einkum notuð til að þykkja grauta og sósur. Maíssterkja er ekki það sama og maísmjöl (e. cornmeal) sem er malað úr þurrkuðu maískorni og er víða grunnfæða líkt og hveiti, kartöflur og hrísgrjón. Lyftiduft þekkja flestir úr bakstri. Það er létt og hentar því vel í þessum tilgangi.

Litarefnin sem eru notuð í litapúðrið í litahlaupinu eru meðal annars unnin úr laufblöðum, blómum, trjáberki og ávaxtaberki og eru litirnir samþykktir sem matarlitir af Matvæla- og lyfjaeftirlits Bandaríkjanna (FDA). Púðrið er vatnsleysanlegt og hættulaust húð og umhverfi og hefur leyfi umhverfisstofnana Evrópusambandsins til notkunar á opnum almenningssvæðum.

Þó að litapúðrið sé talið hættulaust getur það valdið fólki óþægindum við innöndun eða þegar það berst í augu. Til að minnka óþægindi bregða margir þátttakendur á það ráð að hlaupa með klút eða rykgrímu fyrir munninum og með sólgleraugu eða sundgleraugu.

Á íslenskri síðu litahlaupsins er varað við því að erfitt geti verið að ná litnum algerlega úr hvítum fötum og að það þurfi jafnvel að þvo ljóst eða aflitað hár nokkrum sinnum til að losna við litaleifarnar. Bent er á að þvo föt með litapúðri aðskilið frá öðrum þvotti og að bera olíu í hárið fyrir hlaup til að hindra að liturinn festist í hárinu, til dæmis er hægt að nota kókoshnetuolíu eða ólífuolíu.

Heimildir:

• Um the Color Run (Sótt 7.6.2018)
• The Color Run - Spurt og svarað (Sótt 7.6.2018)

Myndir:

• The Color Run, Grand Prix Edition (Melbourne 2014) eftir Chris Phutully. (Sótt 8.6.2018.) Birt undir leyfi Creative Commons CC BY 2.0.
• Seinni mynd úr litahlaupi er fengin af síðunni PXhere. (Sótt 8.6.2018.) Birt undir leyfi Creative Commons CC0.

...