Hvaða rannsóknir hefur Eiríkur Bergmann Einarsson stundað?

Nafn þitt

Netfang þitt

Netfang móttakanda

Ruslpóstvörn =

Svar

Hvaða rannsóknir hefur Eiríkur Bergmann Einarsson stundað?
Eiríkur Bergmann Einarsson er prófessor í stjórnmálafræði við Háskólann á Bifröst og forstöðumaður Evrópufræðasetursins við sama skóla.

Eiríkur hefur stundað rannsóknir á sviði þjóðernishyggju, popúlisma, Evrópumála og þátttökulýðræðis. Hann hefur skrifað fjölda fræðirita – bækur, bókarkafla og vísindagreinar – auk þriggja skáldsagna. Hann hefur einnig verið reglulegur álitsgjafi hjá íslenskum og erlendum fjölmiðlum.

Eiríkur hefur rannsakað og skrifað um mörg þeirra mála sem hæst hefur borið í þjóðmálaumræðu síðustu ára á Íslandi og í nágrannalöndunum, þar á meðal Icesave, stjórnarskrármálið, efnahagshrunið, uppgang þjóðernispopúlista á Norðurlöndum, innflytjendamál, Evrópusambandið og upptöku evrunnar. Bókaútgefandi Eiríks erlendis er Palgrave Macmillan.

Eiríkur hefur starfað við Háskólann á Bifröst frá árinu 2005 en hefur einnig verið gestakennari við ýmsa evrópska háskóla. Hann var aðjúnkt við stjórnmálafræðiskor Háskóla Íslands árin 2004 og 2005.

Eiríkur var skipaður í Stjórnlagaráð á grundvelli þjóðaratkvæðagreiðslu 2010 og vann þar að nýrri stjórnarskrá fyrir Ísland.

Eiríkur Bergmann er fæddur árið 1969. Hann lauk stúdentsprófi frá Fjölbrautaskólanum í Breiðholti árið 1990 og BA-prófi í stjórnmálafræði frá Háskóla Íslands. Eiríkur útskrifaðist með meistaragráðu í alþjóðastjórnmálafræði frá Kaupmannahafnarháskóla 1998 og doktorsgráðu í stjórnmálafræði frá Háskóla Íslands árið 2009. Doktorsverkefni hans bar titilinn „Hið huglæga sjálfstæði þjóðarinnar.“

Mynd:

• Dr. Eiríkur Bergmann | Professor of Politics. (Sótt 27.12.2017).

...