Hvaða rannsóknir hefur Guðmundur Ævar Oddsson stundað?

Nafn þitt

Netfang þitt

Netfang móttakanda

Ruslpóstvörn =

Svar

Hvaða rannsóknir hefur Guðmundur Ævar Oddsson stundað?
Guðmundur Oddsson er dósent við félagsvísinda- og lagadeild Háskólans á Akureyri. Rannsóknir hans snúa að stéttaskiptingu, frávikshegðun og félagslegu taumhaldi.

Doktorsrannsókn Guðmundar skoðar breytingar á hugmyndum Íslendinga um stéttaskiptingu samfara örum þjóðfélagsbreytingum. Rannsóknin byggir á greiningu stéttaorðræðu í Morgunblaðinu og umræðum á Alþingi frá 1986 til 2012 og spurningalistakönnunum. Niðurstöðurnar sýna að ör hnatt- og nýfrjálshyggjuvæðing íslensks þjóðfélags frá miðjum tíunda áratugnum og fram að hruni jók vitund Íslendinga um stéttaskiptingu. Ítarleg greining stéttaorðræðu á hinum pólitíska vettvangi sýnir ennfremur að á uppgangstíma nýfrjálshyggjunnar fjaraði undan þeim „sjálfsögðu sannindum“ að Ísland sé tiltölulega stéttlaust þjóðfélag. Guðmundur rekur aukna vitund um stéttaskiptingu til stóraukins efnahagslegs ójafnaðar á uppgangstíma nýfrjálshyggjunnar, myndunar áberandi og ofurríkrar stéttar „þverþjóðlegra kapítalista“ og mikils innflutnings erlends láglaunafólks.

Guðmundur hefur meðal annars rannsakað hvar einstaklingar sjá sig í stéttakerfinu, sýn þeirra á stéttakerfið, upplifun einstaklinga af óréttlæti eigin þjóðfélagsstöðu og tengsl efnahagslegs ójafnaðar við stærð lögregluliða í stærri borgum Bandaríkjanna. Um þessar mundir rannsakar Guðmundur ásamt öðrum helstu áskoranir lögreglumanna sem starfa utan höfuðborgarsvæðisins. Þá leiðir Guðmundur íslenska hluta samevrópskrar rannsóknar á lögreglunemum (RECPOL). Rannsóknin eykur skilning okkar á hvaðan lögreglunemar koma, gildismati þeirra og viðhorfum. Rannsóknir Guðmundar hafa birst í virtum vísindatímaritum á borð við Acta Sociologica og The Sociological Quarterly.

Guðmundur er fæddur 1978. Hann lauk prófi frá Verkmenntaskólanum á Akureyri 1998 og er með þrjár gráður frá Háskólanum á Akureyri: B.Sc. í viðskiptafræði (2002), kennsluréttindi (2005) og B.A. í samfélags- og hagþróunarfræði (2006). Guðmundur lauk M.A.-prófi í félagsfræði frá Missouri-háskóla 2009 og doktorsprófi í félagsfræði frá sama háskóla 2014. Guðmundur kenndi við Félagsfræðideild Missouri-háskóla samfara doktorsnámi. Frá 2014 til 2017 gegndi Guðmundur stöðu lektors við Félags- og mannfræðideild Norður-Michigan-háskóla. Haustið 2017 hóf Guðmundur störf sem dósent við félagsvísinda- og lagadeild Háskólans á Akureyri, nánar tiltekið við nýstofnaða lögreglufræðibraut.

Myndir:

• Úr safni GÆO.

...