Hver voru algengustu nöfn karla og kvenna árið 1918?

Nafn þitt

Netfang þitt

Netfang móttakanda

Ruslpóstvörn =

Svar

Hver voru algengustu nöfn karla og kvenna árið 1918?
Árið 1918 voru nöfnin Jón og Guðrún algengustu eiginnöfn á Íslandi, rétt eins og verið hafði öldum saman. Þessi nöfn báru höfuð og herðar yfir önnur nöfn í fyrsta manntalinu sem gert var á Íslandi árið 1703. Enn í dag eru þetta algengustu nöfn Íslendinga þótt yfirburðir þeirra séu ekki eins afgerandi og fyrr á tímum.

Á vef Þjóðskjalasafnsins er Manntalsvefur þar sem leita má í nokkrum manntölum fyrri ára. Ekkert manntal var tekið árið 1918 en til eru manntöl fyrir árin 1910 og 1920 og vel er hægt að miða við manntalið 1920, til að skoða hvaða nöfn voru algeng fyrir 100 árum síðan, enda breytast nafnahefðir ekki hratt á milli ára.

Árið 1920 báru næstum 4.900 konur nafnið Guðrún sem fyrsta, annað eða jafnvel þriðja nafn. Næst algengast var nafnið Sigríður en það báru rétt tæplega 4.000 konur. Í þriðja sæti var svo nafnið Kristín og þar á eftir komu nöfnin Ingibjörg, Anna og Helga.

Eins og áður sagði var Jón algengasta karlmannsnafnið, rúmlega 4.300 báru það nafn. Guðmundur kom þar á eftir, tæplega 3000 og þriðja algengasta karlmannsnafnið var Sigurður, tæplega 2.500.

Algengustu eiginnöfn kvenna og karla í manntalinu 1920.

Kvenmannsnöfn	Karlmannsnöfn
Guðrún	Jón
Sigríður	Guðmundur
Kristín	Sigurður
Ingibjörg	Ólafur
Anna	Magnús
Helga	Kristján
Jóhanna	Einar
Margrét	Bjarni
María	Björn

Til samanburður má nefna að algengustu kvenmannsnöfnin í dag eru Guðrún, Anna og Kristín en algengustu karlmannsnöfnin eru eins og áður Jón, Sigurður og Guðmundur.

Heimildir og mynd:

• Manntalsvefur Þjóðskjalasafns Íslands.
• Mannanöfn og nafngiftir á Íslandi. Hagtíðindi, 26. febrúar 2018.
• Ljósmyndasafnið Ísafirði. (Sótt 7. 11. 2018).

...