Hvaða tilgangi þjóna marglyttur?

Nafn þitt

Netfang þitt

Netfang móttakanda

Ruslpóstvörn =

Svar

Hvaða tilgangi þjóna marglyttur?
Í líffræði er yfirleitt ekki talað um að lífverur hafi ákveðinn tilgang. Bambus hefur til dæmis ekki þann tilgang að vera fæða fyrir pöndur, býflugur urðu ekki til bara til að frjóvga blóm, og tilgangur ljóna er ekki að halda niðri stofnstærð grasbíta. Hins vegar eru allar lífverur hluti af flóknu neti lífríkis jarðar og hafa ýmis vistfræðileg hlutverk. Það á einnig við um marglyttur.

Marglyttur eru með einfaldari dýrum þegar horft er til líkamsgerðar. Þær hafa ekki heila, hjarta eða stoðgrind, en hafa dafnað ákaflega vel í vistkerfi heimshafanna. Þær finnast nálægt ströndum og á grunnsævi, úti á opnu hafi og jafnvel í mjög djúpum sjó, auk þess sem örfáar tegundir lifa í ferskvatni.

Marglyttur eru bæði rándýr og bráð og eru þannig mikilvægur hluti af flóknum fæðuvef sjávar. Á matseðli þeirra eru til að mynda sviflægar krabbaflær, hrogn, fisklirfur og aðrar marglyttur. Sjálfar eru þær fæða fyrir fjölmörg dýr, svo sem túnfiska, sverðfiska, hákarla, fugla og sæskjaldbökur. Marglyttur hafa einnig önnur hlutverk, sumar veita ungum fiskum skjól og þær taka þátt í hringrás næringarefna og kolefnis í hafinu.

Marglyttur hafa því engan sérstakan tilgang en eru engu að síður mikilvægur hluti af vistkerfi sjávar.

Heimildir og mynd:

• Hays, G. C., Doyle, T. K., & Houghton, J. D. R. (2018). A Paradigm Shift in the Trophic Importance of Jellyfish? Trends in Ecology & Evolution, 33(11), 874-884. https://doi.org/https://doi.org/10.1016/j.tree.2018.09.001
• Malej, A., Kogovsek, T., & Uye, S. (2014). Medusae - pest or resource for humans?/Meduse - peste o risorsa per l'uomo? Biologia Marina Mediterranea, 21(1), 2-9. https://www.proquest.com/scholarly-journals/medusae-pest-resource-humans-meduse-peste-o/docview/1694453645/se-2
• Yfirlitsmynd: Alberto Montalesi. (2016). Floating jellyfish (Unsplash).jpg Wikimedia Commons. https://commons.wikimedia.org/wiki/File:Floating_jellyfish_Unsplash.jpg

...