Af hverju skjálfa tennurnar og glamra þegar manni er kalt?

Nafn þitt

Netfang þitt

Netfang móttakanda

Ruslpóstvörn =

Svar

Af hverju skjálfa tennurnar og glamra þegar manni er kalt?
Blóð manna, eins og annarra spendýra er jafnheitt (e. endothermic). Það þýðir að litlar sveiflur verða á líkamshita okkar og honum er haldið sem næst 37°C. Hjá dýrum sem hafa misheitt blóð (e. exothermic) eru hitasveiflur hins vegar miklar. Þar getur líkamshitinn farið upp í 40°C og niður í aðeins fáeinar gráður.

Hitanemar í húðinni okkar greina þegar kólnar og skömmu síðar skynja hitanemar sem fylgjast með hitastigi blóðsins sömu breytingu. Þá fara ýmis ferli af stað sem auka varmamyndum í líkamanum og draga um leið úr varmatapi. Við þetta hækkar líkamshitinn og þannig bregst líkaminn við kólnandi umhverfi.

Eitt af þessum viðbrögðum er aukin spenna í beinagrindarvöðvum sem veldur skjálfta í þeim. Skjálftinn eykur varmamyndum í líkamanum og getur hann orðið allt að fjórum sinnum hraðari en þegar kringumstæður eru eðlilegar.

Glamrið í tönnunum á okkur þegar umhverfið kólnar er eingöngu afleiðing af skjálfta í vöðvum kjálkans. Það er sem sagt afleiðing af viðleitni líkamans til að auka varmamyndum með skjálfta í vöðvunum.

Hægt er að lesa meira um þetta í svari við spurningunni Hvers vegna skelfur maður af kulda? en þetta svar byggir einmitt á því.

Mynd:

• HD wallpaper: Afghani, People, Cold, Persons, Winter, frozen, snowfall, snowflakes | Wallpaper Flare. (Sótt 29.08.2023).

...