Hvað skal gera þegar synt er í sjónum og selir nálgast? Er eitthvað að óttast?

Svar

Höfundur þessa svars hefur ekki undir höndum neinar upplýsingar þess efnis að sjósundfólk hafi lent í hremmingum vegna sela. En hafi lesendur Vísindavefsins sögur af slíku væri fróðlegt að heyra þær. Kafarar hafa þó orðið fyrir lítils háttar aðkasti frá brimlum, það er karlkynsselum, en þeir hafa meðal annars nartað í blöðkur kafara. En slíkt vill gerast yfir fengitímann. Brimlar hafa einnig komið nálægt kajakræðurum.

Selir, líkt og önnur villt dýr, geta verið óútreiknanlegir.

Enn fremur geta urtur, það er kvenkynsselir, verið varhugaverðar þegar þær eru með kópa sína nærri. Dæmi um slíkt er þegar urta réðst á kafara og beit hann í Hindisvík. Sem betur fer hlaut kafarinn ekki skaða af en honum hefur eflaust ekki orðið um sel! Kópar geta einnig nartað í sundfit kafara í ærslafullum leik sínum og er slíkt eflaust heldur óþægilegt fyrir varnarlausan sjósundmann.

Undirritaður kannast sjálfur við ögrandi háttalag landselsbrimils undan suðurströnd landsins en það varð með þeim hætti að brimillinn synti fyrir aftan bát, er undirritaður var í, og sló í bátinn með hreifa sínum. Sennilega til þess að ögra ræðaranum eða hræða hann í burtu.

Sjósundfólk sem hyggur á að synda innan um villta seli ætti að hafa í huga að slíkt getur verið hættulegt og ber ekki að mæla með slíku undir neinum kringumstæðum.

Í lokin er rétt að nefna að villt dýr eru óútreiknanleg, til að mynda eru lög í Bandaríkjunum sem banna sundfólki að synda nærri sjávardýrum. Sjósundfólk sem hyggur á að synda innan um villta seli ætti að hafa í huga að slíkt getur verið hættulegt og ber ekki að mæla með slíku undir neinum kringumstæðum. Erfitt er að segja til um hvernig skuli bregðast við ef selir gerast of nærgöngulir. Séu menn nærri landi er best að koma sér þangað sem fyrst. Úti á rúmsjó er málið þó snúnara en höfundur þessa svars getur ekki mælt með einni aðferð fram yfir aðra. Auk þess sem margt annað varasamt getur leynst í sjónum.

Heimildir:

• Fyrri mynd: Landselur - Wikipedia, frjálsa alfræðiritið. (Sótt 20.8.2012).
• Seinni mynd: Landselur - Wikipedia, frjálsa alfræðiritið. (Sótt 20.8.2012).