Hvað liggur hrafninn lengi á eggjum?

Nafn þitt

Netfang þitt

Netfang móttakanda

Ruslpóstvörn =

Svar

Hvað liggur hrafninn lengi á eggjum?
Hrafninn (Corvus corax) hefur mikla útbreiðslu og varptími hans er mjög breytilegur eftir því hvar varpsvæðið er. Á heittempruðum svæðum verpir hann venjulega í febrúar en í apríl á kaldari svæðum svo sem á Íslandi og Grænlandi.

Hér á landi er hrafninn meðal fyrstu fugla til að verpa á vorin, í apríl eða snemma í maí, venjulega 4-6 eggjum. Þar sem varpið er svona snemma vors getur vistin í laupnum verið ósköp kuldaleg. Kvenfuglinn liggur á eggjunum og getur tíminn frá varpi og þar til ungar skríða úr eggjum verið frá 18 og upp í 21 dag. Það er þó klókt að verpa svona snemma þar sem hrafnsungarnir klekjast þá um það leyti sem flestir fuglar eru á eggjum og því næg fæða fyrir hrafnsungana á meðan þeir eru að vaxa úr grasi.

Tíminn frá klaki þar til ungarnir hafa vaxið og þroskast nógu mikið til að yfirgefa hreiðrið er frá 35 og allt upp í 42 daga. Báðir foreldrar sjá um að bera æti í ungana. Fyrstu mánuðina eftir að ungarnir verða fleygir er fjölskyldan saman og því má oft sjá litla hópa af hröfnum, þrjá til sjö fugla, seinni hluta sumars og á haustin. Ungarnir yfirgefa foreldra sína svo eftir nokkra mánuði.

Heimildir og mynd:

• Jóhann Óli Hilmarsson (1999). Íslenskur fuglavísir. Reykjavík, Iðunn.
• Common raven - Wikipedia.
• Mynd: Ravens nest Lastef.jpg - Wikimedia Commons. Höfundur myndar: Lára Stefánsdóttir. Birt undir Creative Commons Attribution 2.0 Generic leyfi. (Sótt 21.6.2019).

...