Í hvaða löndum eru vindmyllur?

Nafn þitt

Netfang þitt

Netfang móttakanda

Ruslpóstvörn =

Svar

Í hvaða löndum eru vindmyllur?
Eins og kemur fram í svari EDS við spurningunni Hvað eru til mörg lönd í heiminum? getur verið snúið að ákveða hvað eigi að miða við þegar land er skilgreint. Oftar en ekki er þó miðað við að land sé sjálfstætt ríki og munum við gera það í þessu svari.

Í áðurnefndu svari kemur fram að lönd heimsins séu 196 talsins. Samkvæmt nýjustu ársskýrslu World Wind Energy Association (WWEA) voru vindmyllur í 105 löndum eða landsvæðum miðað við árið 2014. Samtökin telja sem sagt ýmsar eyjar og önnur landsvæði sem ekki eru sjálfstæð ríki með. Ef við skoðum einungis sjálfstæð ríki, það er lönd eins og við skilgreinum þau lækkar talan úr 105 í 93. Árið 2014 voru því vindmyllur í 93 löndum heims. Lista yfir löndin 93 má sjá aftast í svarinu.

Uppsett afl vindmyllna var 371.559 MW árið 2014 eða tæp 372 TW og var það aukning um 16% frá árinu á undan. Mikill vöxtur hefur verið í aflaukningu eins og sjá má í töflu 1, þó eitthvað hafi dregið úr vextinum síðustu ár.

Tafla 1: Uppsett afl og aflaukning milli ára.

Ár	Uppsett afl [MW]	Aukning frá fyrra ári [%]
1997	7.480	-
1998	9.667	29
1999	13.700	42
2000	18.039	32
2001	24.322	35
2002	31.181	28
2003	39.295	26
2004	47.681	21
2005	59.012	24
2006	74.112	26
2007	93.919	27
2008	120.894	29
2009	159.742	32
2010	197.005	23
2011	236.813	20
2012	282.810	19
2013	319.036	13
2014	371.559	16

Tafla 2 sýnir þau tíu lönd sem eru með mesta uppsetta afl vindmyllna á heimsvísu.

Tafla 2: Lönd þar sem uppsett afl er mest.

Sæti	Land	Uppsett afl [MW]
1	Kína	114.763
2	Bandaríkin	65.754
3	Þýskaland	40.468
4	Spánn	22.987
5	Indland	22.465
6	Bretland	12.440
7	Kanada	9.694
8	Frakkland	9.296
9	Ítalía	8.663
10	Brasilía	5.962

Uppsett afl segir þó ekki alla söguna eins og kemur fram í svari Margrétar Evu Þórðardóttur við spurningunni: Hvernig virka vindmyllur?

Nýtni vindmylla á landi er um 24% af fræðilegu gildi yfir heilt ár en 41% á hafi þar sem vindhraði er yfirleitt meiri.

Væri nýtnin 100% myndi uppsett afl upp á 372 TW gefa um það bil 3261 TWh en áætlað er að árið 2014 hafi vindmyllur gefið af sér um 800 TWh. Sé litið til heildarorkuþarfar heimsins eru 800 TWh um 4% af orkuþörf mannkyns.

Heimildir:

• World Wind Energy Association – WWEA Bulletin Special Issue 2015. (Skoðað 16.05.2017).
• Wind power by country - Wikipedia. (Skoðað 16.05.2017).

Mynd:

• Wind power in China - Wikipedia. Myndrétthafi er Hahaheditor12667. Myndin er birt undir Creative Commons-leyfi. (Sótt 17.05.2017).

---

Hér á eftir má sjá í hvaða löndum vindmyllur eru, flokkað eftir heimsálfum. Fjöldi landa í hverri heimsálfu er innan sviga.

Afríka (12)

Alsír	Eþíópía	Máritíus	Nígería
Egyptaland	Grænhöfðaeyjar	Marokkó	Suður-Afríka
Erítrea	Madagaskar	Namibía	Túnis

Asía (19)

Afganistan	Japan	Nepal	Sýrland
Filippseyjar	Jórdanía	Norður-Kórea	Taíland
Indland	Kasakstan	Pakistan	Taívan
Indónesía	Kína	Sameinuðu arabísku furstadæmin	Víetnam
Íran	Mongólía	Suður-Kórea

Evrópa (35)

Aserbaídsjan	Grikkland	Lettland	Spánn
Austurríki	Holland	Litháen	Sviss
Belgía	Hvíta-Rússland	Lúxemborg	Svíþjóð
Bretland	Írland	Noregur	Tékkland
Búlgaría	Ísland	Pólland	Þýskaland
Danmörk	Ísrael	Portúgal	Tyrkland
Eistland	Ítalía	Rúmenía	Úkraína
Finnland	Króatía	Rússland	Ungverjaland
Frakkland	Kýpur	Slóvakía

Eyjaálfa (5)

Ástralía

Fídjíeyjar

Nýja-Sjáland

Samóa

Vanúatú

Norður-Ameríka (12)

Bandaríkin	Grenada	Kanada	Mexíkó
Dóminíka	Hondúras	Kosta Ríka	Níkaragva
Dóminíska lýðveldið	Jamaíka	Kúba	Sankti Kitts og Nevis

Suður-Ameríka (10)

Argentína	Brasilía	Gvæjana	Perú	Úrugvæ
Bólivía	Ekvador	Kólumbía	Síle	Venesúela

...