Hver eru þrjú stærstu núlifandi landdýrin?

Nafn þitt

Netfang þitt

Netfang móttakanda

Ruslpóstvörn =

Svar

Hver eru þrjú stærstu núlifandi landdýrin?
Stærsta núlifandi landdýrið er afríski gresjufíllinn (Loxodonta africana). Fullvaxnir tarfar verða að jafnaði um 6 tonn að þyngd en þekkt eru dæmi um mun stærri einstaklinga. Stærsti afríski fíllinn sem hefur verið felldur vó tæplega 13 tonn. Hann var drepinn í Angóla árið 1955.

Næststærsta landdýrið er asíski fíllinn (Elephas maximus) sem verður að jafnaði um 4 tonn að þyngd en stærstu tarfarnir geta orðið rúmlega 5,2 tonn.

Þriðja stærsta landdýrið er hvíti nashyrningurinn (Ceratotherium simum) sem lifir nú í suðurhluta Afríku en norður-afríska deilitegundin er nánast útdauð í villtri náttúru. Þessir nashyrningar verða að jafnaði rúmlega 2 tonn að þyngd.

Af öðrum landdýrum sem verða að jafnaði meira en eitt tonn að þyngd má fyrst nefna flóðhesta sem eru svipaðir og hvíti nashyrningurinn að þyngd. Gáruxinn (Bos gaurus) er stórvaxinn nautgripur sem getur orðið rúmlega 1,2 tonn að þyngd. Karldýr gíraffans (Giraffa camelopardalis) verða að jafnaði um 1,2 tonn að þyngd og sömuleiðis svarti nashyrningurinn (Diceros bicornis). Þriðja fílategundin, afríski skógarfíllinn (Loxodonta cyclois) er einnig nokkuð áþekk þessum dýrum að þyngd en tarfarnir geta orðið 1,2 til 1,6 tonn að þyngd.

Mynd:

• Elephant á en.wikipedia.org. Höfundur myndar: Muhammad Mahdi Karim. Birt undir GNU Free Documentation License, version 1.2. (Sótt 19. 3. 2012).
  ...