Eru laktósafríar mjólkurvörur hollari en venjulegar mjólkurvörur?

Nafn þitt

Netfang þitt

Netfang móttakanda

Ruslpóstvörn =

Svar

Eru laktósafríar mjólkurvörur hollari en venjulegar mjólkurvörur?
Stutta svarið er: Laktósafríar mjólkurvörur eru ekki hollari en venjulegar mjólkurvörur, enda er næringarinnihald beggja tegunda mjög svipað. Laktósafríar mjólkurvörur eru þó ákjósanlegur valkostur fyrir þá sem hafa mjólkursykuróþol.

Mjólkurvörur innihalda ýmis orku- og næringarefni. Þar á meðal er mjólkursykurinn laktósi sem er tvísykra samsett úr einsykrunum glúkósa og galaktósa. Til þess að geta melt laktósa þarf líkaminn að framleiða ákveðið ensím sem heitir laktasi. Þegar þetta ensím er til staðar getur líkaminn klofið mjólkursykurinn niður í stakar einsykrur sem frásogast auðveldlega í þörmunum.

Einstaklingar með mjólkursykuróþol hafa ekki þetta ensím eða þá að virkni þess er skert. Það verður til þess að mjólkursykurinn klofnar ekki í sundur og getur því ekki frásogast. Vegna osmósuáhrifa dregst vatn að honum og þannig eykst vökvamagnið inni í þörmum. Mjólkursykurinn fer svo óklofinn áfram í ristil þar sem bakteríur í ristli fara að brjóta hann niður. Við þetta niðurbrot myndast gas og stuttar fitusýrukeðjur sem getur valdið óþægindum, loftgangi og niðurgangi.

Í laktósafríum mjólkurvörum er búið að fjarlægja laktósann eða kljúfa hann í einsykrur sem frásogast auðveldlega. Slíkar vörur eru því hentugur kostur fyrir þá sem hafa mjólkursykuróþol. Næringarinnihald í mjólkurvörum með og án laktósa er mjög svipað. Helsti munurinn er að laktósafríar vörur innihalda örlítið minna magn af kolvetnum og þar af leiðandi orku, þar sem búið er að fjarlægja hluta mjólkursykursins. Þessi munur er þó ekki mikill.

Til samanburðar er hér innihaldslýsing fyrir D-vítamín bætta léttmjólk og laktósafría léttmjólk:*

Miðað við 100 grömm	D-vítamínbætt léttmjólk	Laktósafrí léttmjólk
Orka	45 hitaeiningar (kcal)	39 hitaeiningar (kcal)
Fita	1,5 g	1,5 g
- Þar af mettaðar fitusýrur	0,9 g	0,9 g
Kolvetni	4,5 g	2,9 g
- Þar af ein og tvísykrur	4,5 g	2,9 g
Prótín	3,4 g	3,4 g
Salt	0,1 g	0,1 g
B12-vítamín	0,37 µg	0,37 µg
B2-vítamín	0,16 µg	0,16 µg
D-vítamín	1 µg	1 µg
Fosfór	95 mg	91 mg
Joð	11,2 µg	11,2 µg
Kalk	114 mg	110 mg

*Upplýsingar fengnar af vef Mjólkursamsölunnar.

Tíðni mjólkursykuróþols er mjög mismunandi eftir þjóðerni. Hún er mun lægri hjá fólki af norrænum uppruna heldur en til dæmis hjá Asíu- og Afríkubúum. Þar er hún allt að 98%. Ekki eru til nákvæmar tölur um tíðni mjólkursykuróþols á Íslandi, en líklegast er hún innan við 10%.

Mynd:

• Milk glass bottle wallpaper - ForWallpaper.com. (Sótt 25. 8. 2014).

...